Tag Archives: часопіс “Збожжа”

Кангрэс даследчыкаў Беларусі і Цэнтр “Экумена” запрашаюць да ўдзелу ў секцыі “Царква і гвалт: ахвяры, агрэсары, сведкі”

congressАргкамітэт Міжнароднага Кангрэса даследчыкаў Беларусі абвяшчае збор індывідуальных заявак для ўдзелу ў VIII Кангрэсе, які адбудзецца 27-29 верасня 2019 года ў г. Вільня (Літва).

У межах Кангрэсу пройдзе традыцыйная секцыя, прысвечаная тэалогіі і гісторыі Царквы. У 2019 годзе для секцыі абраная наступная тэма “Царква і гвалт: ахвяры, агрэсары, сведкі”. Каардынатар секцыі — тэолаг Наталля Васілевіч.

У межах секцыі прадугледжаны 4 панэлі:

a. Гвалт як праблема: багаслоўскія ідэі, супольнасць, каноны, літургія

b. Царква: ахвяры: досвед супраціву, ганенняў і міжканфесійнага супрацьстаяння

c. Царква: агрэсары — дэканструкцыя рэпрэсіўных канцэптаў, нормаў і практыкаў, рэлігійныя дысідэнты і рэлігійны фундаменталізм

d. Царква: сведкі — на чыім баку ў канфліктах, на якіх пазіцыях у публічных дыскусіях?

Міждысцыплінарная секцыя мае разгледзіць праблему гвалту ў багаслоўскім, кананічным, літургічным, сацыялагічным, палітычным, антрапалагічным і гістарычным кантэкстах. Любоў, ісціна, свабода, хараство, дабро — гэта ключавыя багаслоўскія і этычныя катэгорыі хрысціянства. Аднак на працягу свайго гістарычнага шляху і ў сучаснасці царква і рэлігія становіцца прасторай гвалту і прыгнёту — культурнага, палітычнага, сімвалічнага, рэпрэсіўным інстытутам, прадукуе дыскурс гвалту і агрэсіі, салідарызуецца з агрэсарамі, ігнаруе гвалт ці апраўдвае яго. У сучасным свеце асаблівую актуальнасць набывае праблема рэлігійнага фундаменталізму, падмуркам якога выступаюць рэлігійныя ідэі і практыкі. У той жа час, царква ў цэлым ці нейкія рэлігійныя групы і асобныя дзеячы могуць станавіцца ахвярамі пераследу і гвалту, пакутнікамі, вызнаўцамі, дысідэнтамі. У межах міждысцыплінарнай секцыі будзе разглядацца шырокае кола пытанняў, звязаных з гвалтам: багаслоўскае асэнсаванне самой праблемы гвалту — у яе рэлігійным, сацыяльнымі, палітычным, культурным і асабістым вымярэнні; роля цэркваў у сучасных грамадскіх дыскусіях па пытаннях абортаў, смяротнага пакарання, хатняга гвалту, рэлігійнага фундаменталізму, дыскрымінацыі, свабоды рэлігіі і правоў чалавека ў цэлым, асэнсаванне рэпрэсій; дэканструкцыя маніпулятыўных, рэпрэсіўных, дыскрымінацыйных практыкаў, якія існуюць у рэлігійных супольнасцях і ў сучасным грамадстве; нормы, кантроль і легітымны гвалт, досвед і наратывы ахвяраў, агрэсараў, сведак гвалту, магчымасці спынення прыгнёту, прымірэння, захаванне памяці; ахвярапрынашэнне ў літургічным, багаслоўскім, палітычным кантэксце; сэксуальнасць і гвалт. 

Прыняць удзел у Кангрэсе можна ў якасці выступоўцы (для гэтага трэба прадставіць тэзісы памерам 2-4 тыс. знакаў) ці госця без даклада.  Можна таксама падаць заяўку на арганізацыю прэзентацыі навуковых, культурных, выдавецкіх праектаў, выставаў і г.д. Арганізацыйны камітэт вітае ўдзел у Кангрэсе журналістаў і прадстаўнікоў СМІ.

Падаць заяўку можна тут. Даклады прымаюцца на беларускай, рускай, украінскай, польскай і ангельскай мовах.

Тэрмін падачы заявак — 25 мая 2019 года.

Па выніках секцыі у 2020 годзе мяркуецца выданне зборніка дакладаў у адмысловым тэматычным нумары навуковым рэцэнзаваным часопісе “Збожжа”.

Кангрэс з’яўляецца самай прадстаўнічай беларускай штогадовай акадэмічнай і экспертнай падзеяй, у працы якога прымаюць удзел усе асноўныя інтэлектуальныя цэнтры даследавання грамадства, палітыкі  і культуры Беларусі. Акрамя гэтага, правядзенне Кангрэса ‘яўляецца выдатнай магчымасцю для распрацоўкі новых жыццяздольных даследчых і грамадскіх праектаў, абмену думкамі і ідэямі, усталявання нефармальных кантактаў з прадстаўнікамі экспертных і акадэмічных супольнасцяў Беларусі і другіх краін.  

Місія Кангрэса – развіццё супольнасці навукоўцаў, аналітыкаў і экспертаў, а таксама спрыянне больш глыбокаму разуменню Беларусі ў акадэмічных асяродках краіны, рэгіёну і свету.

Першыя шэсць кангрэсаў прайшлі ў г. Коўна (Літва), у 2017 году месцам правядзення Кангрэсу была абраная Варшава (Польшча), а ў 2019 годзе — сталіцы Літоўскай Рэспублікі г.Вільня. Пачынаючы з 2011 года Цэнтр “Экумена” ўдзельнічае ў арганізацыі багаслоўскай тэматычнай панэлі кангрэсу.

Чарговая сустрэча беларускіх тэолагаў і царкоўных служыцеляў у замежжы: Парыж-Шэўтонь-Брусэль 2019

З 9 па 12 лютага 2019 года адбылася чарговая сустрэча беларускіх тэолагаў і царкоўных служыцеляў у замежжы, галоўныя мерапрыемствы якой прайшлі ў Парыжы, Шэўтоні і Брусэлі. Удзел у сустрэчы прынялі дырэктар і члены Цэнтра “Экумена” Наталля Васілевіч (Бонн, Германія),  Наталля Гарковіч (Мінск, Беларусь), святар Аляксандр Шрамко, а таксама д-р Анастасія Вудэн (Каталіцкі ўніверсітэт у Амерыцы, Вашынгтон, ЗША), дыякан Антон Гелясаў (Гальская Мітраполія Ўсясветнага Патрыярхату, Парыж, Францыя), Андрэй Строцаў (магістрант Вышэйшай школы сацыяльных навук (EHESS), Парыж, Францыя)

Адной з нагодаў стала высвячэнне ў дыяканскі сан Антона Гелясава, якое адбылося на свята св. Харалампія, 10 лютага, у Свята-Сцяфанаўскім саборы ў Парыжы (Мітраполія Ўсясветнага Патрыярхату), дзе і будзе здзяйсняць сваё служэнне. Дыяканскае пасвячэнне беларускі праваслаўны багаслоў прыняў з рук Мітрапаліта Гальскага Эмануіла.

Новапасвечаны дыякан Антон Гелясаў, мітр. Гальскі Эмануіл, Наталля Васілевіч і святар Аляксандр Шрамко, сабор св. Сцяфана, Парыж, 10 лютага 2019
Новапасвечаны дыякан Антон Гелясаў, мітр. Гальскі Эмануіл, Наталля Васілевіч і святар Аляксандр Шрамко, сабор св. Сцяфана, Парыж, 10 лютага 2019

Акрамя ўдзелу ў святкаваннях, звязаных з хіратоніяй Антона Гелясава, беларускія тэолагі правялі ў Парыжы сустрэчу са старшынём Рускага студэнцкага хрысціянскага руху Кірылам Салагубам, наведалі Рускі духоўна-культурны цэнтр (Карсунская епархія Маскоўскага Патрыярхату), Свята-Аляксандра-Неўскі сабор (Архіепіскапія праваслаўных рускіх цэркваў у Заходняй Еўропе), пагутарылі пра цяперашнюю сітуацыю, якая складаецца ў царкве ў Еўропе, асабліва што датычыць лёсу Архіепіскапіі.

Наталля Гарковіч, Андрэй Строцаў, Анастасія Вудэн, святар Аляксандр Шрамко пры ўваходзе ў сабор св. Аляксандра Неўскага на вуліцы Дару, Парыж.
Наталля Гарковіч, Андрэй Строцаў, Анастасія Вудэн, святар Аляксандр Шрамко пры ўваходзе ў сабор св. Аляксандра Неўскага на вуліцы Дару, Парыж.

Апроч таго, у Парыжы прайшло працоўнае пасяджэнне арганізацыйнага камітэту па правядзенні багаслоўскай секцыі ў межах 8 Міжнароднага кангрэсу даследчыкаў Беларусі, які адбудзецца 27-29 верасня 2019 года ў Вільнюсе, была вызначаная тэма секцыі — “Царква і гвалт: ахвяры, агрэсары і сведкі”, а таксама асноўныя пытанні, якія маюць быць разгледжаныя на секцыі. Удзельнікі сустрэчы таксама абмеркавалі падрыхтоўку першага нумару часопіса міждысцыплінарных і міжканфесійных даследаванняў “Збожжа”, які мае выйсці неўзабаве.

11 лютага дэлегацыя ў складзе Наталлі Васілевіч, Наталлі Гарковіч і Анастасіі Вудэн выправілася ў каталіцкі бенедыктынскі Крыжаўдзвіжанскі манастыр у мястэчку Шэўтонь (Бельгія). Варта адзначыць, што ў 1951 годзе ў Шэўтоні адбылася гістарычная сустрэча беларусаў у межах студыяў БАКА “Рунь”, удзел у якой тады прымалі біскуп Баляслаў Слосканс, Апостальскі Адміністратар Менскі і Магілёўскі, святар Леў Гарошка, будучы біскуп Часлаў Сіповіч, святар Аляксандр Надсан, Вітаўт Рамук, святар Міхась Маскалік, Міхась Наўмовіч, Тодар Мазура і інш. (Гл. падрабязней у “Божым шляхам” (№4(43), 1951). Прадстаўніцы багаслоўскай дэлегацыі азнаёміліся з духоўным і акадэмічным жыццём і дзейнасцю манастыра.

д-р Анастасія Вудэн, Наталля Васілевіч, Наталля Гарковіч ля сцен Крыжаўздзвіжанскага манастыра, Шэўтонь, Бельгія
Д-р Анастасія Вудэн, Наталля Васілевіч, Наталля Гарковіч (“зБожжа”) ля сцен Крыжаўздзвіжанскага манастыра, Шэўтонь, Бельгія, 2019 год
Удзельнікі беларускага студый БАКА "Рунь", 1951 год, Шэўтонь, Бельгія
Удзельнікі беларускага студый БАКА “Рунь”, ля сцен Крыжаўздзвіжанскага манастыра, Шэўтонь, Бельгія. 1951 год

Пасля ранішняга богаслужэння Наталля Васілевіч і Наталля Гарковіч выправіліся ў Брусэль, дзе сустрэліся з Генеральным сакратаром Канферэнцыі еўрапейскіх цэркваў прот. Хейкі Хутуненам, даўнім сябрам Беларусі, а таксама ўдзельнікам праектаў Цэнтра “Экумена”. Яны абмеркавалі сітуацыю ў экуменічным руху ў Еўропе і магчымасці супрацоўніцтва.

Наталля Васілевіч, прот. Хейкі Хутунен (КЕЦ), Наталля Гарковіч
Наталля Васілевіч, прот. Хейкі Хутунен (КЕЦ), Наталля Гарковіч

Наладжванне акадэмічнага, царкоўнага і экуменічнага супрацоўніцтва, а таксама асабістых сяброўскіх кантактаў паміж беларускімі багасловамі і царкоўнымі дзеячамі ў замежжы і ў Беларусі, павышэнне бачнасці і пашырэнне прысутнасці беларусаў у кантэксце еўрапейскага хрысціянскага руху і акадэмічнай супольнасці — гэта адзін з прыярытэтаў Цэнтра “Экумена” і сеткі супрацоўніцтва “зБожжа”.

Цэнтр “Экумена” запрашае аўтараў да ўдзелу ў багаслоўскім часопісе “Збожжа”

Цэнтр “Экумена” запрашае аўтараў да ўдзелу ў публікацыі ў беларускім часопісе міждысціплінарных і міжканфесійных даследаванняў хрысціянства “Збожжа” (Zbožža). Першы нумар будзе прысвечаны тэме Ecclesia semper reformanda est: Царква, рэформы і Рэфармацыя. Да друку прымаюцца даследніцкія артыкулы, а таксама эсэ.

Першы нумар часопіса працягне развагі тэматычнай секцыі VII Міжнароднага кангрэсу даследчыкаў Беларусі, які прайшоў 15-17 верасня 2017 года ў Варшаве. У 2017 годзе адзначалася 500-годдзе Рэфармацыі, якая не толькі стала пачаткам утварэння новых хрысціянскіх канфесій з асаблівым багаслоўем, сацыяльна-палітычнай пазіцыяй і ладам жыцця, але таксама істотна паўплывала і на Рымскую, і на Усходнія цэрквы. Дыялог, супрацьстаянне і ўзаемны ўплыў розных канфесій у Беларусі сфармавалі асаблівы канфесійны профіль, як у гістарычнай перспектыве, так і ў сучаснасці. Нумар будзе прысвечаны развагам аб ролі Рэфармацыі для Беларусі і беларускага хрысціянства, аб асаблівасцях беларускага пратэстантызму, ягонай грамадскай і палітычнай ролі, актуальным стане і перспектывах развіцця. Апроч таго, яшчэ дзве нагоды: 100-годдзе з пачатку Сабору Рускай Царквы 1917-1918 года, які стаў прыкладам інтэнсіўнай рэфлексіі аб рэформах, неабходных у рускім і сусветным праваслаўі, а таксама 55-годдзе з адкрыцця Другога Ватыканскага Сабору, які адкрыў новую эпоху ў жыцці Каталіцкай Царквы, — гэта нагода паразважаць аб Рэфармацыі ў больш шырокім міжканфесійным кантэксце. Якія рэформы неабходныя сёння ў багаслоўі, літургіі, сацыяльнай пазіцыі цэркваў, іх адміністратыўнай структуры, самаразуменні, а таксама ў ладзе, мове, дыскурсе, мадэлях узамеадносінаў з грамадствам, у этыцы і эстэтыцы? На якой падставе і якім чынам праводзіць гэтыя рэформы? Хто з’яўляецца суб’ектам рэформ? Якія крытэры ацэнкі эфектыўнасці рэформ? Што з’яўляецца асноўнымі першакодамі на шляху рэформ? Якая можа быць роля акадэміі, грамадзянскай супольнасці і экуменічнага супрацоўніцтва ў гэтым працэсе? Ці патрэбна рэформам свая ідэалогія? Ці можам мы наогул казаць у хрысціянскім кантэксце пра рэформы як пра нешта пазітыўнае? Якія пераўтварэнні адбываліся ў царкве цягам ейнага развіцця, як яны абгрунтоўваліся і асэнсоўваліся?

Пра часопіс

Часопіс быў заснаваны ЦэнтрамЭкумена ў супрацоўніцтве з Сеткай беларускаіх багасловаў і царкоўных дзеячаў у замежжы і Беларускім інстытутам стратэгічных даследаванняў (BISS). Ідэя часопіса ўзнікала падчас правядзення Першай працоўнай сустрэчы беларускіх тэолагаў і царкоўных служыцеляў у замежжы, якая прайшла з 2 па 4 чэрвеня 2017 года ў Цюбінгене, Германія. Канцэпцыя першага нумару была распрацаваная падчас правядзення багаслоўскай тэматычнай секцыі VII Міжнароднага кангрэсу даследчыкаў Беларусі, якая адбылася з 15 па 17 верасня 2017 года ў Варшаве, Польшча. Часопіс мае з’яднаць тых, хто займаецца даследаваннямі хрысціянства, багаслоўскай думкі і царквы ў Беларусі, а таксама тых багасловаў, якія маюць беларускае паходжанне, але жывуць і працуюць у замежжы.

У выдавецкую раду часопіса, якую ўзначаліла дырэктар Цэнтра “Экумена” Наталля Васілевіч, увайшлі акадэмічныя валанцёры Цэнтра “Экумена” Наталля Гарковіч, Раіса Зянюк і святар Аляксандр Шрамко, а таксама Пётр Рудкоўскі, акадэмічны дырэктар Беларускага інстытута стратэгічных даследаванняў (BISS). Навуковая рада часопіса аб’ядноўвае вядомых навукоўцаў і багасловаў, які звязаны з Беларуссю — паходжаннем ці тэматыкай даследаванняў. Сярод іх: Пётр Буценеў, Алег Брэскі, іераманах Іаан (Булыка), Яўгенія Даніловіч, Аляксандр Дуброўскі, Раіса Зянюк, Надзея Кіцэнка, Алена Лянкевіч, Пётр Рудкоўскі, святар Міхаіл Самкоў, Вольга Сытая. Выпускаючы рэдактар першага нумару — навуковая супрацоўніца Інстытута гісторыі Нацыянальнай акадэміі навук Беларусі, кандыдат гістарычных навук Раіса Зянюк.

Дэдлайн падачы матэрыялаў: 28 лютага 2018 года.

Артыкулы дасылаюцца на наступны адрас: zbozza.by@gmail.com У тэме ліста пазначайце: Zbozza Reformation

Афармленне рукапісу, часопіс “Збожжа”

Да друку прымаюцца артыкулы і матэрыялы па тэме нумару памерам ад 1500 да 6000 словаў (ад 10000 да 40000 знакаў з прабеламі) на беларускай, рускай, ангельскай, польскай, нямецкай, фанцузскай мовай.

Кожны артыкул апроч тэкста павінен мець назву; звесткі пра аўтара; анатацыю (да 200 словаў); ключавыя словы — на беларускай, англійскай і арыгінальнай мове артыкула; бібліяграфію з пералічэннем усіх згаданых у артыкуле крыніц. Бібліяграфія размяшчаецца ў канцы артыкула пад загалоўкам “Бібліяграфія / References” са спісам, які ў алфавітным парадку ўтрымлівае спасылкі на крыніцы. Калі артыкул публікуецца на мове з лацінскай графікай, то спіс крыніц сартыруецца паводле лацінскага алфавіту, а кірылічныя крыніцы, ці крыніцы ў іншай графіцы транслітэруюцца па-лацінску (у дужках даюцца арыгінальныя назвы). Калі артыкул публікуецца на мове з кірылічнай графікай, то спачатку ідуць спасылкі на крыніцы ў кірылічнай графіцы, размешчаны ў парадку беларускага/рускага алфавіту, і праз інтэрвал – крыніцы на мовах з лацінскай графікай і транслітэраваныя некірылічныя і нелацінскія крыніцы (у дужках даюцца арыгінальныя назвы) – у парадку лацінскага алфавіту.

Загаловак выраўніваецца па цэнтры, пасля друкуецца імя і прозвішча аўтара, навуковая ступень, пазначэнне акадэмічнага статуса, мясцовасць і іншая важная інфармацыя. Памер 2–3 сказы. Далей друкуюцца ключавыя словы, анатацыя, тэкст артыкула і бібліграфія, якія выраўнівацца па абодвух баках.

Арыткул падаецца ў наступных шрыфтах Times New Roman, Georgia ці Palatino. Інтэрвал – адзінкавы. Кожны абзац пачынаецца з чырвонага радка. Памер асноўнага тэкста – 12, памер зносак і вялікіх цытат — 11.

Спасылкі і цытаты

Усе спасылкі і цытаты павінны афармляцца старонкавымі зноскамі (унізе старонкі), мець скразны характар нумарацыі. Фразы, якія цытуюцца павінны быць вылучаны курсівам і ўзяты ў двухкоссі. Цытаты памерам больш за тры радкі афармляюцца вынясеннем іх у асобны параграф з водступам і больш дробным шрыфтам. Спасылкі афармляюцца оксфардскім стылем: http://oxfordjournals.org/our_journals/ojlr/for_authors/

Аўтарскае права

Падаючы артыкул на публікацыю ў часопіс, аўтар прымае на сябе адказназнасць за любыя парушэнні, звязаныя з аўтарскім правам пры публікацыі такога артыкула. Пасля публікацыі артыкула аўтар атрымлівае копію свайго артыкула ў фармаце pdf і можа размяшчаць яго ў інтэрнэце менавіта ў такім выглядзе, са спасылкай на часопіс “Збожжа”. Пры перапублікацыі арыгінальнага артыкула, яго частак як на той мове, на якой ён быў апублікаваны ў часопісе “Збожжа”, так і ў перакладзе, павінна быць пазначана, што часопіс “Збожжа” з’яўляецца месцам першай публікацыі.

Рэцэнзаванне артыкулаў

Усе артыкулы праходзяць двойчы сляпое (ананімнае) рэцэнзаванне. Рэцэнзентамі могуць быць як сябры навуковай рады, так і знешнія эксперты.